आठवा कधी तुम्ही मैत्री करताना
जात धर्म पाहिला आहे,
परधर्माच्या मित्रांसाठी
नक्कीच स्वधर्मीयांना भांडला आहे
अतूट होती मैत्री तुमची
मनापासून, हृदयापासून,
क्षणालाही करमत नव्हते
तुम्हाला एकमेकांपासून
जात वेगळी, धर्म वेगळे
पक्ष वेगळे, रंग वेगळे,
तरीही जगत होता रे तुम्ही
जिवलग मित्र बनून सगळे
राज्यकर्त्यांना बघवत नाही
मैत्री तुमची अशी अतूट,
पोळी भाजत नाही त्यांची
पाहूनी तुमची एकजूट
कावा त्यांचा ओळखा तुम्ही
बनू नका धर्मांध असे रे,
सत्तेसाठी धडपड त्यांची
तुमचे कुणाला भान नसे रे
सद्सद्विवेक बुद्धी जागवून
विचार स्वतःच करा नेटका,
एकसंघ राहूनी सगळे
द्या दुष्ट शक्तींना झटका
जात पंथ अन् धर्म विसरूनी
भारतीय तुम्ही बना आता रे,
माणुसकीला धर्म मानूनी
सुंदर बनवा या जगता रे...
✒ K. Satish
No comments:
Post a Comment