बनावटी बगळे

कर्तव्य स्वतःचे पार पाडता येईना

पण दुसर्‍यावरती रूबाब मोठा,

बनावटी ही माणसे करती

कार्यस्थळावरी अविरत तोटा

गलेलठ्ठ हा पगार घेती

कार्य परंतु यांचे क्षुल्लक,

अपयश आपुले झाकण्यासाठी

करती कनिष्ठांची हे पिळवणूक

कागद खोटे भरूनी सदैव

करती दिशाभूल वेळोवेळी,

कष्टकऱ्यांचे श्रेय हडपती

वृत्ती यांची कपटी काळी

सत्य नेहमी लपविले जाते

अधोगती संस्थेची होते,

तरीही होते यांची दिवाळी

कष्टकऱ्यांची होळी होते

समजत नाही कधी थांबेल हे

दुष्टचक्र असे बनावटीचे,

न्याय कधी मिळेल सत्याला

होईल का पतन या असत्याचे ?

✒ K. Satish